3miz

دویورلر

 

سئویرم ،

دویولر سئومه یه خاطیر،

سئویلن زامان دا  دویورلر  منی .

ائندیرین بابامین پاسلی قیلینجین ،

قوروملار ساللانمیش ،

هیسلی تاواندان ،

زاغلایین  تییه سین ،

سیندیرین قینین ،

اورداکی ،

یاساقدیر سئویب – سئویلمک ،

یاشاماق ایستیرم ،

            نیفرته خاطیر .

نوشته شده در ۱۳۸۸/٦/۱۱ساعت ۱٢:٤٩ ‎ق.ظ توسط baris نظرات () |

 

داشگینان سهند

 

تانری نین صبرینی ،

کئچدی صبرین ؛

داشا جاقسان داشگینان سهند!

 سن ،

دنلی خرمن لرین یانماسینی ،

سرین سو کوزه لری نین جالانماسینی گوروبسن ،

                                                سهند!

مین گوندن بیر گونه ،

دوزوملر مرزینی سیندیریب ،

آشاجاقسان سهند !

دونن سیز ، صاباحسیز چوروکلر ،

سنین وارلیغینی دانانمازلار.

سن وارلیغینی ،

آیریلار کیمی ،

آلچاقلاردان دیلن مه می سن .

سن نیسگیللی ائللرین ،

نیسگیل داغی سان سهند !

سن اودلو قیلینجی ،

جنایت قوخولو قینلاردا یوخ ،

الوولو سینه نین ،

یاراسیندا ساخلامیسان سهند !

سن ،

تولوق کیمی هاوادان شیشیریلمیش داغلاری یوخ ،

آلچاق ایسه ،

دوغرودان دوغرویا اوجالاری ،

یاردیما چاغیرانسان سهند !

تانری نین صبرینی کئچدی صبرین ،

داشا جاقسان ،

داش گینان سهند !

نوشته شده در ۱۳۸۸/٦/۱۱ساعت ۱٢:۳٧ ‎ق.ظ توسط baris نظرات () |

 

یارایمز دوواردیر

   

بیزیم یارایمز دوواردیر دئیم ،

قورتولوشا چاتماق آختاریرسان

آرامیز دابیتن چیبان کیمی زوققولدادایان دوواری،

سن اویاندان نئشترله مه لی سن ،

من بویاندان .

ایستی دوداقلاریم ،

اوپوشونون یولونو گوزله ییر .

بیز جان کیمی بیربیریمیزه هورولن زامان ،

هانکی الدیر کی بیزی بیربیریمیزدن آییرسین .

بو سوزده کن ،

دامداکی بوزکوپک لر سس سسه وئریب اولاشدیلار .

سسیمی یئل آپاردی ،

سارامی دا سئل .

دووارلاری بیر قات داها قالینلا تد یلار .

 

                           ( باریشمار )

نوشته شده در ۱۳۸۸/٦/۳ساعت ۱٢:۱٧ ‎ق.ظ توسط baris نظرات () |

یادان چیخدیم

 

تاریخ منی ،

قولدورلارین اللرینی سیخماغینان ،

یادلایاجاق ،

یادلاماسین ،

قوی یانیلیم ،

یاددان چیخیم ؛

ایزه ده سنین،

توز دا سنین .

 

              ( باریشمار )

نوشته شده در ۱۳۸۸/٦/٢ساعت ۱۱:٥٧ ‎ب.ظ توسط baris نظرات () |

یورما منی

 

سن یولسان ،

من یولچو ،

یول وئر کئچیم ،

          تله سیرم .

بیلیرسن می هچ ؟

یولچوسوز یولاری چالی بورویر .

قوی ،

چالیلارینی ایاقلا ماقلا ،

ایکی میزی ده اولدوزلو شه هره چاتدیریم ،

یولون یوخوسونو ،

          یولچو یورار ،

                 یورما منی .

 

 

                              ( باریشمار )

نوشته شده در ۱۳۸۸/٦/٢ساعت ۱۱:٤٧ ‎ب.ظ توسط baris نظرات () |


قالب وبلاگ : قالب وبلاگ